א מענה-רך ישיב חמה ודבר-עצב יעלה-אף br

ב לשון חכמים תיטיב דעת ופי כסילים יביע אולת br

ג בכל-מקום עיני יהוה צפות רעים וטובים br

ד מרפא לשון עץ חיים וסלף בה שבר ברוח br

ה אויל--ינאץ מוסר אביו ושמר תוכחת יערים br

ו בית צדיק חסן רב ובתבואת רשע נעכרת br

ז שפתי חכמים יזרו דעת ולב כסילים לא-כן br

ח זבח רשעים תועבת יהוה ותפלת ישרים רצונו br

ט תועבת יהוה דרך רשע ומרדף צדקה יאהב br

י מוסר רע לעזב ארח שונא תוכחת ימות br

יא שאול ואבדון נגד יהוה אף כי-לבות בני-אדם br

יב לא יאהב-לץ הוכח לו אל-חכמים לא ילך br

יג לב שמח ייטב פנים ובעצבת-לב רוח נכאה br

יד לב נבון יבקש-דעת ופני (ופי) כסילים ירעה אולת br

טו כל-ימי עני רעים וטוב-לב משתה תמיד br

טז טוב-מעט ביראת יהוה-- מאוצר רב ומהומה בו br

יז טוב ארחת ירק ואהבה-שם-- משור אבוס ושנאה-בו br

יח איש חמה יגרה מדון וארך אפים ישקיט ריב br

יט דרך עצל כמשכת חדק וארח ישרים סללה br

כ בן חכם ישמח-אב וכסיל אדם בוזה אמו br

כא אולת שמחה לחסר-לב ואיש תבונה יישר-לכת br

כב הפר מחשבות באין סוד וברב יועצים תקום br

כג שמחה לאיש במענה-פיו ודבר בעתו מה-טוב br

כד ארח חיים למעלה למשכיל-- למען סור משאול מטה br

כה בית גאים יסח יהוה ויצב גבול אלמנה br

כו תועבת יהוה מחשבות רע וטהרים אמרי-נעם br

כז עכר ביתו בוצע בצע ושונא מתנת יחיה br

כח לב צדיק יהגה לענות ופי רשעים יביע רעות br

כט רחוק יהוה מרשעים ותפלת צדיקים ישמע br

ל מאור-עינים ישמח-לב שמועה טובה תדשן-עצם br

לא אזן--שמעת תוכחת חיים בקרב חכמים תלין br

לב פורע מוסר מואס נפשו ושומע תוכחת קונה לב br

לג יראת יהוה מוסר חכמה ולפני כבוד ענוה