א כי-תשב ללחום את-מושל-- בין תבין את-אשר לפניך br

ב ושמת שכין בלעך-- אם-בעל נפש אתה br

ג אל-תתאו למטעמותיו והוא לחם כזבים br

ד אל-תיגע להעשיר מבינתך חדל br

ה התעוף (התעיף) עיניך בו ואיננו br כי עשה יעשה-לו כנפים כנשר ועיף (יעוף) השמים

ו אל-תלחם--את-לחם רע עין ואל-תתאו למטעמתיו br

ז כי כמו שער בנפשו-- כן-הוא br אכול ושתה יאמר לך ולבו בל-עמך br

ח פתך-אכלת תקיאנה ושחת דבריך הנעימים br

ט באזני כסיל אל-תדבר כי-יבוז לשכל מליך br

י אל-תסג גבול עולם ובשדי יתומים אל-תבא br

יא כי-גאלם חזק הוא-יריב את-ריבם אתך br

יב הביאה למוסר לבך ואזנך לאמרי-דעת br

יג אל-תמנע מנער מוסר כי-תכנו בשבט לא ימות br

יד אתה בשבט תכנו ונפשו משאול תציל br

טו בני אם-חכם לבך-- ישמח לבי גם-אני br

טז ותעלזנה כליותי-- בדבר שפתיך מישרים br

יז אל-יקנא לבך בחטאים כי אם-ביראת-יהוה כל-היום br

יח כי אם-יש אחרית ותקותך לא תכרת br

יט שמע-אתה בני וחכם ואשר בדרך לבך br

כ אל-תהי בסבאי-יין-- בזללי בשר למו br

כא כי-סבא וזולל יורש וקרעים תלביש נומה br

כב שמע לאביך זה ילדך ואל-תבוז כי-זקנה אמך br

כג אמת קנה ואל-תמכר חכמה ומוסר ובינה br

כד גול (גיל) יגיל אבי צדיק יולד (ויולד) חכם וישמח- (ישמח-) בו br

כה ישמח-אביך ואמך ותגל יולדתך br

כו תנה-בני לבך לי ועיניך דרכי תרצנה (תצרנה) br

כז כי-שוחה עמקה זונה ובאר צרה נכריה br

כח אף-היא כחתף תארב ובוגדים באדם תוסף br

כט למי אוי למי אבוי למי מדונים (מדינים) למי שיח-- למי פצעים חנם br למי חכללות עינים br

ל למאחרים על-היין-- לבאים לחקר ממסך br

לא אל-תרא יין כי יתאדם כי-יתן בכיס (בכוס) עינו יתהלך במישרים br

לב אחריתו כנחש ישך וכצפעני יפרש br

לג עיניך יראו זרות ולבך ידבר תהפכות br

לד והיית כשכב בלב-ים וכשכב בראש חבל br

לה הכוני בל-חליתי-- הלמוני בל-ידעתי br מתי אקיץ אוסיף אבקשנו עוד