א אל-תתהלל ביום מחר כי לא-תדע מה-ילד יום br

ב יהללך זר ולא-פיך נכרי ואל-שפתיך br

ג כבד-אבן ונטל החול וכעס אויל כבד משניהם br

ד אכזריות חמה ושטף אף ומי יעמד לפני קנאה br

ה טובה תוכחת מגלה-- מאהבה מסתרת br

ו נאמנים פצעי אוהב ונעתרות נשיקות שונא br

ז נפש שבעה תבוס נפת ונפש רעבה כל-מר מתוק br

ח כצפור נודדת מן-קנה-- כן-איש נודד ממקומו br

ט שמן וקטרת ישמח-לב ומתק רעהו מעצת-נפש br

י רעך ורעה (ורע) אביך אל-תעזב-- ובית אחיך אל-תבוא ביום אידך br טוב שכן קרוב מאח רחוק br

יא חכם בני ושמח לבי ואשיבה חרפי דבר br

יב ערום ראה רעה נסתר פתאים עברו נענשו br

יג קח-בגדו כי-ערב זר ובעד נכריה חבלהו br

יד מברך רעהו בקול גדול--בבקר השכים קללה תחשב לו br

טו דלף טורד ביום סגריר ואשת מדונים (מדינים) נשתוה br

טז צפניה צפן-רוח ושמן ימינו יקרא br

יז ברזל בברזל יחד ואיש יחד פני-רעהו br

יח נצר תאנה יאכל פריה ושמר אדניו יכבד br

יט כמים הפנים לפנים-- כן לב-האדם לאדם br

כ שאול ואבדה לא תשבענה ועיני האדם לא תשבענה br

כא מצרף לכסף וכור לזהב ואיש לפי מהללו br

כב אם תכתוש-את-האויל במכתש בתוך הריפות-- בעלי br לא-תסור מעליו אולתו br

כג ידע תדע פני צאנך שית לבך לעדרים br

כד כי לא לעולם חסן ואם-נזר לדור דור (ודור) br

כה גלה חציר ונראה-דשא ונאספו עשבות הרים br

כו כבשים ללבושך ומחיר שדה עתודים br

כז ודי חלב עזים--ללחמך ללחם ביתך וחיים לנערותיך