א בני אם-תקח אמרי ומצותי תצפן אתך br

ב להקשיב לחכמה אזנך תטה לבך לתבונה br

ג כי אם לבינה תקרא לתבונה תתן קולך br

ד אם-תבקשנה ככסף וכמטמונים תחפשנה br

ה אז--תבין יראת יהוה ודעת אלהים תמצא br

ו כי-יהוה יתן חכמה מפיו דעת ותבונה br

ז וצפן (יצפן) לישרים תושיה מגן להלכי תם br

ח לנצר ארחות משפט ודרך חסידו ישמר br

ט אז--תבין צדק ומשפט ומישרים כל-מעגל-טוב br

י כי-תבוא חכמה בלבך ודעת לנפשך ינעם br

יא מזמה תשמר עליך תבונה תנצרכה br

יב להצילך מדרך רע מאיש מדבר תהפכות br

יג העזבים ארחות ישר-- ללכת בדרכי-חשך br

יד השמחים לעשות רע יגילו בתהפכות רע br

טו אשר ארחתיהם עקשים ונלוזים במעגלותם br

טז להצילך מאשה זרה מנכריה אמריה החליקה br

יז העזבת אלוף נעוריה ואת-ברית אלהיה שכחה br

יח כי שחה אל-מות ביתה ואל-רפאים מעגלתיה br

יט כל-באיה לא ישובון ולא-ישיגו ארחות חיים br

כ למען--תלך בדרך טובים וארחות צדיקים תשמר br

כא כי-ישרים ישכנו-ארץ ותמימים יותרו בה br

כב ורשעים מארץ יכרתו ובוגדים יסחו ממנה