א לץ היין המה שכר וכל-שגה בו לא יחכם br

ב נהם ככפיר אימת מלך מתעברו חוטא נפשו br

ג כבוד לאיש שבת מריב וכל-אויל יתגלע br

ד מחרף עצל לא-יחרש ישאל (ושאל) בקציר ואין br

ה מים עמקים עצה בלב-איש ואיש תבונה ידלנה br

ו רב-אדם--יקרא איש חסדו ואיש אמונים מי ימצא br

ז מתהלך בתמו צדיק אשרי בניו אחריו br

ח מלך יושב על-כסא-דין-- מזרה בעיניו כל-רע br

ט מי-יאמר זכיתי לבי טהרתי מחטאתי br

י אבן ואבן איפה ואיפה-- תועבת יהוה גם-שניהם br

יא גם במעלליו יתנכר-נער-- אם-זך ואם-ישר פעלו br

יב אזן שמעת ועין ראה-- יהוה עשה גם-שניהם br

יג אל-תאהב שנה פן-תורש פקח עיניך שבע-לחם br

יד רע רע יאמר הקונה ואזל לו אז יתהלל br

טו יש זהב ורב-פנינים וכלי יקר שפתי-דעת br

טז לקח-בגדו כי-ערב זר ובעד נכרים (נכריה) חבלהו br

יז ערב לאיש לחם שקר ואחר ימלא-פיהו חצץ br

יח מחשבות בעצה תכון ובתחבלות עשה מלחמה br

יט גולה-סוד הולך רכיל ולפתה שפתיו לא תתערב br

כ מקלל אביו ואמו-- ידעך נרו באישון (באשון) חשך br

כא נחלה מבחלת (מבהלת) בראשונה ואחריתה לא תברך br

כב אל-תאמר אשלמה-רע קוה ליהוה וישע לך br

כג תועבת יהוה אבן ואבן ומאזני מרמה לא-טוב br

כד מיהוה מצעדי-גבר ואדם מה-יבין דרכו br

כה מוקש אדם ילע קדש ואחר נדרים לבקר br

כו מזרה רשעים מלך חכם וישב עליהם אופן br

כז נר יהוה נשמת אדם חפש כל-חדרי-בטן br

כח חסד ואמת יצרו-מלך וסעד בחסד כסאו br

כט תפארת בחורים כחם והדר זקנים שיבה br

ל חברות פצע תמריק (תמרוק) ברע ומכות חדרי-בטן