א איש תוכחות מקשה-ערף-- פתע ישבר ואין מרפא br

ב ברבות צדיקים ישמח העם ובמשל רשע יאנח עם br

ג איש-אהב חכמה ישמח אביו ורעה זונות יאבד-הון br

ד מלך--במשפט יעמיד ארץ ואיש תרומות יהרסנה br

ה גבר מחליק על-רעהו רשת פורש על-פעמיו br

ו בפשע איש רע מוקש וצדיק ירון ושמח br

ז ידע צדיק דין דלים רשע לא-יבין דעת br

ח אנשי לצון יפיחו קריה וחכמים ישיבו אף br

ט איש-חכם--נשפט את-איש אויל ורגז ושחק ואין נחת br

י אנשי דמים ישנאו-תם וישרים יבקשו נפשו br

יא כל-רוחו יוציא כסיל וחכם באחור ישבחנה br

יב משל מקשיב על-דבר-שקר-- כל-משרתיו רשעים br

יג רש ואיש תככים נפגשו-- מאיר עיני שניהם יהוה br

יד מלך שופט באמת דלים-- כסאו לעד יכון br

טו שבט ותוכחת יתן חכמה ונער משלח מביש אמו br

טז ברבות רשעים ירבה-פשע וצדיקים במפלתם יראו br

יז יסר בנך ויניחך ויתן מעדנים לנפשך

יח באין חזון יפרע עם ושמר תורה אשרהו br

יט בדברים לא-יוסר עבד כי-יבין ואין מענה br

כ חזית--איש אץ בדבריו תקוה לכסיל ממנו br

כא מפנק מנער עבדו ואחריתו יהיה מנון br

כב איש-אף יגרה מדון ובעל חמה רב-פשע br

כג גאות אדם תשפילנו ושפל-רוח יתמך כבוד br

כד חולק עם-גנב שונא נפשו אלה ישמע ולא יגיד br

כה חרדת אדם יתן מוקש ובוטח ביהוה ישגב br

כו רבים מבקשים פני-מושל ומיהוה משפט-איש br

כז תועבת צדיקים איש עול ותועבת רשע ישר-דרך