א הלא-חכמה תקרא ותבונה תתן קולה br

ב בראש-מרמים עלי-דרך בית נתיבות נצבה br

ג ליד-שערים לפי-קרת מבוא פתחים תרנה br

ד אליכם אישים אקרא וקולי אל-בני אדם br

ה הבינו פתאים ערמה וכסילים הבינו לב br

ו שמעו כי-נגידים אדבר ומפתח שפתי מישרים br

ז כי-אמת יהגה חכי ותועבת שפתי רשע br

ח בצדק כל-אמרי-פי אין בהם נפתל ועקש br

ט כלם נכחים למבין וישרים למצאי דעת br

י קחו-מוסרי ואל-כסף ודעת מחרוץ נבחר br

יא כי-טובה חכמה מפנינים וכל-חפצים לא ישוו-בה br

יב אני-חכמה שכנתי ערמה ודעת מזמות אמצא br

יג יראת יהוה שנאת-רע br גאה וגאון ודרך רע ופי תהפכות שנאתי br

יד לי-עצה ותושיה אני בינה לי גבורה br

טו בי מלכים ימלכו ורזנים יחקקו צדק br

טז בי שרים ישרו ונדיבים כל-שפטי צדק br

יז אני אהביה (אהבי) אהב ומשחרי ימצאנני br

יח עשר-וכבוד אתי הון עתק וצדקה br

יט טוב פריי מחרוץ ומפז ותבואתי מכסף נבחר br

כ בארח-צדקה אהלך בתוך נתיבות משפט br

כא להנחיל אהבי יש ואצרתיהם אמלא br

כב יהוה--קנני ראשית דרכו קדם מפעליו מאז br

כג מעולם נסכתי מראש-- מקדמי-ארץ br

כד באין-תהמות חוללתי באין מעינות נכבדי-מים br

כה בטרם הרים הטבעו לפני גבעות חוללתי br

כו עד-לא עשה ארץ וחוצות וראש עפרות תבל br

כז בהכינו שמים שם אני בחקו חוג על-פני תהום br

כח באמצו שחקים ממעל בעזוז עינות תהום br

כט בשומו לים חקו ומים לא יעברו-פיו בחוקו מוסדי ארץ br

ל ואהיה אצלו אמון ואהיה שעשועים יום יום משחקת לפניו בכל-עת br

לא משחקת בתבל ארצו ושעשעי את-בני אדם

לב ועתה בנים שמעו-לי ואשרי דרכי ישמרו br

לג שמעו מוסר וחכמו ואל-תפרעו br

לד אשרי אדם שמע-לי לשקד על-דלתתי יום יום--לשמר מזוזת פתחי br

לה כי מצאי מצאי (מצא) חיים ויפק רצון מיהוה br

לו וחטאי חמס נפשו כל-משנאי אהבו מות