א בני אם-ערבת לרעך תקעת לזר כפיך br

ב נוקשת באמרי-פיך נלכדת באמרי-פיך br

ג עשה זאת אפוא בני והנצל-- כי באת בכף-רעך br לך התרפס ורהב רעיך br

ד אל-תתן שנה לעיניך ותנומה לעפעפיך br

ה הנצל כצבי מיד וכצפור מיד יקוש

ו לך-אל-נמלה עצל ראה דרכיה וחכם br

ז אשר אין-לה קצין-- שטר ומשל br

ח תכין בקיץ לחמה אגרה בקציר מאכלה br

ט עד-מתי עצל תשכב מתי תקום משנתך br

י מעט שנות מעט תנומות מעט חבק ידים לשכב br

יא ובא-כמהלך ראשך ומחסרך כאיש מגן

יב אדם בליעל איש און הולך עקשות פה br

יג קרץ בעינו מלל ברגלו מרה באצבעתיו br

יד תהפכות בלבו--חרש רע בכל-עת מדנים (מדינים) ישלח br

טו על-כן--פתאם יבוא אידו פתע ישבר ואין מרפא

טז שש-הנה שנא יהוה ושבע תועבות (תועבת) נפשו br

יז עינים רמות לשון שקר וידים שפכות דם-נקי br

יח לב--חרש מחשבות און רגלים ממהרות לרוץ לרעה br

יט יפיח כזבים עד שקר ומשלח מדנים בין אחים

כ נצר בני מצות אביך ואל-תטש תורת אמך br

כא קשרם על-לבך תמיד ענדם על-גרגרתך br

כב בהתהלכך תנחה אתך-- בשכבך תשמר עליך br והקיצות היא תשיחך br

כג כי נר מצוה ותורה אור ודרך חיים תוכחות מוסר br

כד לשמרך מאשת רע מחלקת לשון נכריה br

כה אל-תחמד יפיה בלבבך ואל-תקחך בעפעפיה br

כו כי בעד-אשה זונה עד-ככר-לחם br ואשת איש-- נפש יקרה תצוד

כז היחתה איש אש בחיקו ובגדיו לא תשרפנה br

כח אם-יהלך איש על-הגחלים ורגליו לא תכוינה br

כט כן--הבא אל-אשת רעהו לא-ינקה כל-הנגע בה br

ל לא-יבוזו לגנב כי יגנוב-- למלא נפשו כי ירעב br

לא ונמצא ישלם שבעתים את-כל-הון ביתו יתן br

לב נאף אשה חסר-לב משחית נפשו הוא יעשנה br

לג נגע-וקלון ימצא וחרפתו לא תמחה br

לד כי-קנאה חמת-גבר ולא-יחמול ביום נקם br

לה לא-ישא פני כל-כפר ולא-יאבה כי תרבה-שחד