א בני תורתי אל-תשכח ומצותי יצר לבך br

ב כי ארך ימים ושנות חיים-- ושלום יוסיפו לך br

ג חסד ואמת אל-יעזבך br קשרם על-גרגרותיך כתבם על-לוח לבך br

ד ומצא-חן ושכל-טוב-- בעיני אלהים ואדם br

ה בטח אל-יהוה בכל-לבך ואל-בינתך אל-תשען br

ו בכל-דרכיך דעהו והוא יישר ארחתיך br

ז אל-תהי חכם בעיניך ירא את-יהוה וסור מרע br

ח רפאות תהי לשרך ושקוי לעצמותיך br

ט כבד את-יהוה מהונך ומראשית כל-תבואתך br

י וימלאו אסמיך שבע ותירוש יקביך יפרצו br

יא מוסר יהוה בני אל-תמאס ואל-תקץ בתוכחתו br

יב כי את אשר יאהב יהוה יוכיח br וכאב את-בן ירצה br

יג אשרי אדם מצא חכמה ואדם יפיק תבונה br

יד כי טוב סחרה מסחר-כסף ומחרוץ תבואתה br

טו יקרה היא מפניים (מפנינים) וכל-חפציך לא ישוו-בה br

טז ארך ימים בימינה בשמאולה עשר וכבוד br

יז דרכיה דרכי-נעם וכל-נתיבותיה שלום br

יח עץ-חיים היא למחזיקים בה ותמכיה מאשר

יט יהוה--בחכמה יסד-ארץ כונן שמים בתבונה br

כ בדעתו תהומות נבקעו ושחקים ירעפו-טל br

כא בני אל-ילזו מעיניך נצר תשיה ומזמה br

כב ויהיו חיים לנפשך וחן לגרגרתיך br

כג אז תלך לבטח דרכך ורגלך לא תגוף br

כד אם-תשכב לא-תפחד ושכבת וערבה שנתך br

כה אל-תירא מפחד פתאם ומשאת רשעים כי תבא br

כו כי-יהוה יהיה בכסלך ושמר רגלך מלכד br

כז אל-תמנע-טוב מבעליו-- בהיות לאל ידיך (ידך) לעשות br

כח אל-תאמר לרעיך (לרעך) לך ושוב--ומחר אתן ויש אתך br

כט אל-תחרש על-רעך רעה והוא-יושב לבטח אתך br

ל אל-תרוב (תריב) עם-אדם חנם-- אם-לא גמלך רעה br

לא אל-תקנא באיש חמס ואל-תבחר בכל-דרכיו br

לב כי תועבת יהוה נלוז ואת-ישרים סודו br

לג מארת יהוה בבית רשע ונוה צדיקים יברך br

לד אם-ללצים הוא-יליץ ולעניים (ולענוים) יתן-חן br

לה כבוד חכמים ינחלו וכסילים מרים קלון