א דברי למואל מלך-- משא אשר-יסרתו אמו br

ב מה-ברי ומה-בר-בטני ומה בר-נדרי br

ג אל-תתן לנשים חילך ודרכיך למחות מלכין br

ד אל למלכים למואל--אל למלכים שתו-יין ולרוזנים או (אי) שכר br

ה פן-ישתה וישכח מחקק וישנה דין כל-בני-עני br

ו תנו-שכר לאובד ויין למרי נפש br

ז ישתה וישכח רישו ועמלו לא יזכר-עוד

ח פתח-פיך לאלם אל-דין כל-בני חלוף br

ט פתח-פיך שפט-צדק ודין עני ואביון

י אשת-חיל מי ימצא ורחק מפנינים מכרה br

יא בטח בה לב בעלה ושלל לא יחסר br

יב גמלתהו טוב ולא-רע-- כל ימי חייה br

יג דרשה צמר ופשתים ותעש בחפץ כפיה br

יד היתה כאניות סוחר ממרחק תביא לחמה br

טו ותקם בעוד לילה--ותתן טרף לביתה וחק לנערתיה br

טז זממה שדה ותקחהו מפרי כפיה נטע (נטעה) כרם br

יז חגרה בעוז מתניה ותאמץ זרועתיה br

יח טעמה כי-טוב סחרה לא-יכבה בליל (בלילה) נרה br

יט ידיה שלחה בכישור וכפיה תמכו פלך br

כ כפה פרשה לעני וידיה שלחה לאביון br

כא לא-תירא לביתה משלג כי כל-ביתה לבש שנים br

כב מרבדים עשתה-לה שש וארגמן לבושה br

כג נודע בשערים בעלה בשבתו עם-זקני-ארץ br

כד סדין עשתה ותמכר וחגור נתנה לכנעני br

כה עז-והדר לבושה ותשחק ליום אחרון br

כו פיה פתחה בחכמה ותורת חסד על-לשונה br

כז צופיה הילכות (הליכות) ביתה ולחם עצלות לא תאכל br

כח קמו בניה ויאשרוה בעלה ויהללה br

כט רבות בנות עשו חיל ואת עלית על-כלנה br

ל שקר החן והבל היפי אשה יראת-יהוה היא תתהלל br

לא תנו-לה מפרי ידיה ויהללוה בשערים מעשיה {ש}