א ויען צפר הנעמתי ויאמר br

ב הרב דברים לא יענה ואם-איש שפתים יצדק br

ג בדיך מתים יחרישו ותלעג ואין מכלם br

ד ותאמר זך לקחי ובר הייתי בעיניך br

ה ואולם--מי יתן אלוה דבר ויפתח שפתיו עמך br

ו ויגד-לך תעלמות חכמה-- כי-כפלים לתושיה br ודע-- כי-ישה לך אלוה מעונך br

ז החקר אלוה תמצא אם עד-תכלית שדי תמצא br

ח גבהי שמים מה-תפעל עמקה משאול מה-תדע br

ט ארכה מארץ מדה ורחבה מני-ים br

י אם-יחלף ויסגיר ויקהיל ומי ישיבנו br

יא כי-הוא ידע מתי-שוא וירא-און ולא יתבונן br

יב ואיש נבוב ילבב ועיר פרא אדם יולד br

יג אם-אתה הכינות לבך ופרשת אליו כפיך br

יד אם-און בידך הרחיקהו ואל-תשכן באהליך עולה br

טו כי-אז תשא פניך ממום והיית מצק ולא תירא br

טז כי-אתה עמל תשכח כמים עברו תזכר br

יז ומצהרים יקום חלד תעפה כבקר תהיה br

יח ובטחת כי-יש תקוה וחפרת לבטח תשכב br

יט ורבצת ואין מחריד וחלו פניך רבים br

כ ועיני רשעים תכלינה ומנוס אבד מנהם ותקותם מפח-נפש