א הודו ליהוה כי-טוב כי לעולם חסדו br

ב יאמר-נא ישראל כי לעולם חסדו br

ג יאמרו-נא בית-אהרן כי לעולם חסדו br

ד יאמרו-נא יראי יהוה כי לעולם חסדו br

ה מן-המצר קראתי יה ענני במרחב יה br

ו יהוה לי לא אירא מה-יעשה לי אדם br

ז יהוה לי בעזרי ואני אראה בשנאי br

ח טוב לחסות ביהוה-- מבטח באדם br

ט טוב לחסות ביהוה-- מבטח בנדיבים br

י כל-גוים סבבוני בשם יהוה כי אמילם br

יא סבוני גם-סבבוני בשם יהוה כי אמילם br

יב סבוני כדבורים-- דעכו כאש קוצים br בשם יהוה כי אמילם br

יג דחה דחיתני לנפל ויהוה עזרני br

יד עזי וזמרת יה ויהי-לי לישועה br

טו קול רנה וישועה--באהלי צדיקים ימין יהוה עשה חיל br

טז ימין יהוה רוממה ימין יהוה עשה חיל br

יז לא-אמות כי-אחיה ואספר מעשי יה br

יח יסר יסרני יה ולמות לא נתנני br

יט פתחו-לי שערי-צדק אבא-בם אודה יה br

כ זה-השער ליהוה צדיקים יבאו בו br

כא אודך כי עניתני ותהי-לי לישועה br

כב אבן מאסו הבונים-- היתה לראש פנה br

כג מאת יהוה היתה זאת היא נפלאת בעינינו br

כד זה-היום עשה יהוה נגילה ונשמחה בו br

כה אנא יהוה הושיעה נא אנא יהוה הצליחה נא br

כו ברוך הבא בשם יהוה ברכנוכם מבית יהוה br

כז אל יהוה--ויאר-לנו אסרו-חג בעבתים--עד קרנות המזבח br

כח אלי אתה ואודך אלהי ארוממך br

כט הודו ליהוה כי-טוב כי לעולם חסדו