א למנצח על-ידיתון (ידותון) לאסף מזמור br

ב קולי אל-אלהים ואצעקה קולי אל-אלהים והאזין אלי br

ג ביום צרתי אדני דרשתי br ידי לילה נגרה--ולא תפוג מאנה הנחם נפשי br

ד אזכרה אלהים ואהמיה אשיחה ותתעטף רוחי סלה br

ה אחזת שמרות עיני נפעמתי ולא אדבר br

ו חשבתי ימים מקדם-- שנות עולמים br

ז אזכרה נגינתי בלילה עם-לבבי אשיחה ויחפש רוחי br

ח הלעולמים יזנח אדני ולא-יסיף לרצות עוד br

ט האפס לנצח חסדו גמר אמר לדר ודר br

י השכח חנות אל אם-קפץ באף רחמיו סלה br

יא ואמר חלותי היא-- שנות ימין עליון br

יב אזכיר (אזכור) מעללי-יה כי-אזכרה מקדם פלאך br

יג והגיתי בכל-פעלך ובעלילותיך אשיחה br

יד אלהים בקדש דרכך מי-אל גדול כאלהים br

טו אתה האל עשה פלא הודעת בעמים עזך br

טז גאלת בזרוע עמך בני-יעקב ויוסף סלה br

יז ראוך מים אלהים--ראוך מים יחילו אף ירגזו תהמות br

יח זרמו מים עבות--קול נתנו שחקים אף-חצציך יתהלכו br

יט קול רעמך בגלגל--האירו ברקים תבל רגזה ותרעש הארץ br

כ בים דרכך--ושביליך (ושבילך) במים רבים ועקבותיך לא נדעו br [ (Psalms 77:21) כא נחית כצאן עמך-- ביד-משה ואהרן ]