א לדוד אל-תתחר במרעים אל-תקנא בעשי עולה br

ב כי כחציר מהרה ימלו וכירק דשא יבולון br

ג בטח ביהוה ועשה-טוב שכן-ארץ ורעה אמונה br

ד והתענג על-יהוה ויתן-לך משאלת לבך br

ה גול על-יהוה דרכך ובטח עליו והוא יעשה br

ו והוציא כאור צדקך ומשפטך כצהרים br

ז דום ליהוה-- והתחולל-לו br אל-תתחר במצליח דרכו באיש עשה מזמות br

ח הרף מאף ועזב חמה אל-תתחר אך-להרע br

ט כי-מרעים יכרתון וקוי יהוה המה יירשו-ארץ br

י ועוד מעט ואין רשע והתבוננת על-מקומו ואיננו br

יא וענוים יירשו-ארץ והתענגו על-רב שלום br

יב זמם רשע לצדיק וחרק עליו שניו br

יג אדני ישחק-לו כי-ראה כי-יבא יומו br

יד חרב פתחו רשעים-- ודרכו קשתם br להפיל עני ואביון לטבוח ישרי-דרך br

טו חרבם תבוא בלבם וקשתותם תשברנה br

טז טוב-מעט לצדיק-- מהמון רשעים רבים br

יז כי זרועות רשעים תשברנה וסומך צדיקים יהוה br

יח יודע יהוה ימי תמימם ונחלתם לעולם תהיה br

יט לא-יבשו בעת רעה ובימי רעבון ישבעו br

כ כי רשעים יאבדו ואיבי יהוה כיקר כרים כלו בעשן כלו br

כא לוה רשע ולא ישלם וצדיק חונן ונותן br

כב כי מברכיו יירשו ארץ ומקלליו יכרתו br

כג מיהוה מצעדי-גבר כוננו ודרכו יחפץ br

כד כי-יפל לא-יוטל כי-יהוה סומך ידו br

כה נער הייתי-- גם-זקנתי br ולא-ראיתי צדיק נעזב וזרעו מבקש-לחם br

כו כל-היום חונן ומלוה וזרעו לברכה br

כז סור מרע ועשה-טוב ושכן לעולם br

כח כי יהוה אהב משפט ולא-יעזב את-חסידיו לעולם נשמרו br וזרע רשעים נכרת br

כט צדיקים יירשו-ארץ וישכנו לעד עליה br

ל פי-צדיק יהגה חכמה ולשונו תדבר משפט br

לא תורת אלהיו בלבו לא תמעד אשריו br

לב צופה רשע לצדיק ומבקש להמיתו br

לג יהוה לא-יעזבנו בידו ולא ירשיענו בהשפטו br

לד קוה אל-יהוה ושמר דרכו וירוממך לרשת ארץ br בהכרת רשעים תראה br

לה ראיתי רשע עריץ ומתערה כאזרח רענן br

לו ויעבר והנה איננו ואבקשהו ולא נמצא br

לז שמר-תם וראה ישר כי-אחרית לאיש שלום br

לח ופשעים נשמדו יחדו אחרית רשעים נכרתה br

לט ותשועת צדיקים מיהוה מעוזם בעת צרה br

מ ויעזרם יהוה ויפלטם יפלטם מרשעים ויושיעם--כי-חסו בו