א ויען בלדד השחי ויאמר br

ב עד-אנה תשימון קנצי למלין תבינו ואחר נדבר br

ג מדוע נחשבנו כבהמה נטמינו בעיניכם br

ד טרף נפשו באפו הלמענך תעזב ארץ ויעתק-צור ממקמו br

ה גם אור רשעים ידעך ולא-יגה שביב אשו br

ו אור חשך באהלו ונרו עליו ידעך br

ז יצרו צעדי אונו ותשליכהו עצתו br

ח כי-שלח ברשת ברגליו ועל-שבכה יתהלך br

ט יאחז בעקב פח יחזק עליו צמים br

י טמון בארץ חבלו ומלכדתו עלי נתיב br

יא סביב בעתהו בלהות והפיצהו לרגליו br

יב יהי-רעב אנו ואיד נכון לצלעו br

יג יאכל בדי עורו יאכל בדיו בכור מות br

יד ינתק מאהלו מבטחו ותצעדהו למלך בלהות br

טו תשכון באהלו מבלי-לו יזרה על-נוהו גפרית br

טז מתחת שרשיו יבשו וממעל ימל קצירו br

יז זכרו-אבד מני-ארץ ולא-שם לו על-פני-חוץ br

יח יהדפהו מאור אל-חשך ומתבל ינדהו br

יט לא נין לו ולא-נכד בעמו ואין שריד במגוריו br

כ על-יומו נשמו אחרנים וקדמנים אחזו שער br

כא אך-אלה משכנות עול וזה מקום לא-ידע-אל