א מדוע--משדי לא-נצפנו עתים וידעו לא-חזו ימיו br

ב גבלות ישיגו עדר גזלו וירעו br

ג חמור יתומים ינהגו יחבלו שור אלמנה br

ד יטו אבינים מדרך יחד חבאו עניי-ארץ br

ה הן פראים במדבר-- יצאו בפעלם משחרי לטרף br ערבה לו לחם לנערים br

ו בשדה בלילו יקצירו (יקצורו) וכרם רשע ילקשו br

ז ערום ילינו מבלי לבוש ואין כסות בקרה br

ח מזרם הרים ירטבו ומבלי מחסה חבקו-צור br

ט יגזלו משד יתום ועל-עני יחבלו br

י ערום הלכו בלי לבוש ורעבים נשאו עמר br

יא בין-שורתם יצהירו יקבים דרכו ויצמאו br

יב מעיר מתים ינאקו-- ונפש-חללים תשוע br ואלוה לא-ישים תפלה br

יג המה היו--במרדי-אור לא-הכירו דרכיו ולא ישבו בנתיבתיו br

יד לאור יקום רוצח--יקטל-עני ואביון ובלילה יהי כגנב br

טו ועין נאף שמרה נשף לאמר-- לא-תשורני עין br וסתר פנים ישים br

טז חתר בחשך בתים יומם חתמו-למו לא-ידעו אור br

יז כי יחדו בקר למו צלמות כי-יכיר בלהות צלמות br

יח קל-הוא על-פני-מים-- תקלל חלקתם בארץ br לא-יפנה דרך כרמים br

יט ציה גם-חם יגזלו מימי-שלג שאול חטאו br

כ ישכחהו רחם מתקו רמה-- עוד לא-יזכר br ותשבר כעץ עולה br

כא רעה עקרה לא תלד ואלמנה לא ייטיב br

כב ומשך אבירים בכחו יקום ולא-יאמין בחיין br

כג יתן-לו לבטח וישען ועיניהו על-דרכיהם br

כד רומו מעט ואיננו והמכו ככל יקפצון br וכראש שבלת ימלו br

כה ואם-לא אפו מי יכזיבני וישם לאל מלתי