א ויסף אליהוא ויאמר br

ב כתר-לי זעיר ואחוך כי עוד לאלוה מלים br

ג אשא דעי למרחוק ולפעלי אתן-צדק br

ד כי-אמנם לא-שקר מלי תמים דעות עמך br

ה הן-אל כביר ולא ימאס כביר כח לב br

ו לא-יחיה רשע ומשפט עניים יתן br

ז לא-יגרע מצדיק עיניו br ואת-מלכים לכסא וישיבם לנצח ויגבהו br

ח ואם-אסורים בזקים ילכדון בחבלי-עני br

ט ויגד להם פעלם ופשעיהם כי יתגברו br

י ויגל אזנם למוסר ויאמר כי-ישובון מאון br

יא אם-ישמעו ויעבדו יכלו ימיהם בטוב ושניהם בנעימים br

יב ואם-לא ישמעו בשלח יעברו ויגועו בבלי-דעת br

יג וחנפי-לב ישימו אף לא ישועו כי אסרם br

יד תמת בנער נפשם וחיתם בקדשים br

טו יחלץ עני בעניו ויגל בלחץ אזנם br

טז ואף הסיתך מפי-צר-- רחב לא-מוצק תחתיה br ונחת שלחנך מלא דשן br

יז ודין-רשע מלאת דין ומשפט יתמכו br

יח כי-חמה פן-יסיתך בספק ורב-כפר אל-יטך br

יט היערך שועך לא בצר וכל מאמצי-כח br

כ אל-תשאף הלילה-- לעלות עמים תחתם br

כא השמר אל-תפן אל-און כי-על-זה בחרת מעני br

כב הן-אל ישגיב בכחו מי כמהו מורה br

כג מי-פקד עליו דרכו ומי-אמר פעלת עולה br

כד זכר כי-תשגיא פעלו-- אשר שררו אנשים br

כה כל-אדם חזו-בו אנוש יביט מרחוק br

כו הן-אל שגיא ולא נדע מספר שניו ולא-חקר br

כז כי יגרע נטפי-מים יזקו מטר לאדו br

כח אשר-יזלו שחקים ירעפו עלי אדם רב br

כט אף אם-יבין מפרשי-עב תשאות סכתו br

ל הן-פרש עליו אורו ושרשי הים כסה br

לא כי-בם ידין עמים יתן-אכל למכביר br

לב על-כפים כסה-אור ויצו עליה במפגיע br

לג יגיד עליו רעו מקנה אף על-עולה