א הודו ליהוה קראו בשמו הודיעו בעמים עלילותיו br

ב שירו-לו זמרו-לו שיחו בכל-נפלאותיו br

ג התהללו בשם קדשו ישמח לב מבקשי יהוה br

ד דרשו יהוה ועזו בקשו פניו תמיד br

ה זכרו--נפלאותיו אשר-עשה מפתיו ומשפטי-פיו br

ו זרע אברהם עבדו בני יעקב בחיריו br

ז הוא יהוה אלהינו בכל-הארץ משפטיו br

ח זכר לעולם בריתו דבר צוה לאלף דור br

ט אשר כרת את-אברהם ושבועתו לישחק br

י ויעמידה ליעקב לחק לישראל ברית עולם br

יא לאמר--לך אתן את-ארץ-כנען חבל נחלתכם br

יב בהיותם מתי מספר כמעט וגרים בה br

יג ויתהלכו מגוי אל-גוי מממלכה אל-עם אחר br

יד לא-הניח אדם לעשקם ויוכח עליהם מלכים br

טו אל-תגעו במשיחי ולנביאי אל-תרעו br

טז ויקרא רעב על-הארץ כל-מטה-לחם שבר br

יז שלח לפניהם איש לעבד נמכר יוסף br

יח ענו בכבל רגליו (רגלו) ברזל באה נפשו br

יט עד-עת בא-דברו-- אמרת יהוה צרפתהו br

כ שלח מלך ויתירהו משל עמים ויפתחהו br

כא שמו אדון לביתו ומשל בכל-קנינו br

כב לאסר שריו בנפשו וזקניו יחכם br

כג ויבא ישראל מצרים ויעקב גר בארץ-חם br

כד ויפר את-עמו מאד ויעצמהו מצריו br

כה הפך לבם לשנא עמו להתנכל בעבדיו br

כו שלח משה עבדו אהרן אשר בחר-בו br

כז שמו-בם דברי אתותיו ומפתים בארץ חם br

כח שלח חשך ויחשך ולא-מרו את-דבריו (דברו) br

כט הפך את-מימיהם לדם וימת את-דגתם br

ל שרץ ארצם צפרדעים בחדרי מלכיהם br

לא אמר ויבא ערב כנים בכל-גבולם br

לב נתן גשמיהם ברד אש להבות בארצם br

לג ויך גפנם ותאנתם וישבר עץ גבולם br

לד אמר ויבא ארבה וילק ואין מספר br

לה ויאכל כל-עשב בארצם ויאכל פרי אדמתם br

לו ויך כל-בכור בארצם ראשית לכל-אונם br

לז ויוציאם בכסף וזהב ואין בשבטיו כושל br

לח שמח מצרים בצאתם כי-נפל פחדם עליהם br

לט פרש ענן למסך ואש להאיר לילה br

מ שאל ויבא שלו ולחם שמים ישביעם br

מא פתח צור ויזובו מים הלכו בציות נהר br

מב כי-זכר את-דבר קדשו את-אברהם עבדו br

מג ויוצא עמו בששון ברנה את-בחיריו br

מד ויתן להם ארצות גוים ועמל לאמים יירשו br

מה בעבור ישמרו חקיו-- ותורתיו ינצרו br הללו-יה