א הללו-יה br הודו ליהוה כי-טוב-- כי לעולם חסדו br

ב מי--ימלל גבורות יהוה ישמיע כל-תהלתו br

ג אשרי שמרי משפט עשה צדקה בכל-עת br

ד זכרני יהוה ברצון עמך פקדני בישועתך br

ה לראות בטובת בחיריך-- לשמח בשמחת גויך br להתהלל עם-נחלתך br

ו חטאנו עם-אבותינו העוינו הרשענו br

ז אבותינו במצרים לא-השכילו נפלאותיך-- br לא זכרו את-רב חסדיך br וימרו על-ים בים-סוף br

ח ויושיעם למען שמו-- להודיע את-גבורתו br

ט ויגער בים-סוף ויחרב ויוליכם בתהמות כמדבר br

י ויושיעם מיד שונא ויגאלם מיד אויב br

יא ויכסו-מים צריהם אחד מהם לא נותר br

יב ויאמינו בדבריו ישירו תהלתו br

יג מהרו שכחו מעשיו לא-חכו לעצתו br

יד ויתאוו תאוה במדבר וינסו-אל בישימון br

טו ויתן להם שאלתם וישלח רזון בנפשם br

טז ויקנאו למשה במחנה לאהרן קדוש יהוה br

יז תפתח-ארץ ותבלע דתן ותכס על-עדת אבירם br

יח ותבער-אש בעדתם להבה תלהט רשעים br

יט יעשו-עגל בחרב וישתחוו למסכה br

כ וימירו את-כבודם בתבנית שור אכל עשב br

כא שכחו אל מושיעם-- עשה גדלות במצרים br

כב נפלאות בארץ חם נוראות על-ים-סוף br

כג ויאמר להשמידם br לולי משה בחירו-- עמד בפרץ לפניו br להשיב חמתו מהשחית br

כד וימאסו בארץ חמדה לא-האמינו לדברו br

כה וירגנו באהליהם לא שמעו בקול יהוה br

כו וישא ידו להם-- להפיל אותם במדבר br

כז ולהפיל זרעם בגוים ולזרותם בארצות br

כח ויצמדו לבעל פעור ויאכלו זבחי מתים br

כט ויכעיסו במעלליהם ותפרץ-בם מגפה br

ל ויעמד פינחס ויפלל ותעצר המגפה br

לא ותחשב לו לצדקה לדר ודר עד-עולם br

לב ויקציפו על-מי מריבה וירע למשה בעבורם br

לג כי-המרו את-רוחו ויבטא בשפתיו br

לד לא-השמידו את-העמים-- אשר אמר יהוה להם br

לה ויתערבו בגוים וילמדו מעשיהם br

לו ויעבדו את-עצביהם ויהיו להם למוקש br

לז ויזבחו את-בניהם ואת-בנותיהם-- לשדים br

לח וישפכו דם נקי דם-בניהם ובנותיהם-- אשר זבחו לעצבי כנען br ותחנף הארץ בדמים br

לט ויטמאו במעשיהם ויזנו במעלליהם br

מ ויחר-אף יהוה בעמו ויתעב את-נחלתו br

מא ויתנם ביד-גוים וימשלו בהם שנאיהם br

מב וילחצום אויביהם ויכנעו תחת ידם br

מג פעמים רבות יצילם br והמה ימרו בעצתם וימכו בעונם br

מד וירא בצר להם-- בשמעו את-רנתם br

מה ויזכר להם בריתו וינחם כרב חסדו br

מו ויתן אותם לרחמים-- לפני כל-שוביהם br

מז הושיענו יהוה אלהינו וקבצנו מן-הגוים br להדות לשם קדשך להשתבח בתהלתך br

מח ברוך יהוה אלהי ישראל מן-העולם ועד העולם-- br ואמר כל-העם אמן br הללו-יה