א מזמור לאסף br אך טוב לישראל אלהים-- לברי לבב br

ב ואני--כמעט נטוי (נטיו) רגלי כאין שפכה (שפכו) אשרי br

ג כי-קנאתי בהוללים שלום רשעים אראה br

ד כי אין חרצבות למותם ובריא אולם br

ה בעמל אנוש אינמו ועם-אדם לא ינגעו br

ו לכן ענקתמו גאוה יעטף-שית חמס למו br

ז יצא מחלב עינמו עברו משכיות לבב br

ח ימיקו וידברו ברע עשק ממרום ידברו br

ט שתו בשמים פיהם ולשונם תהלך בארץ br

י לכן ישיב (ישוב) עמו הלם ומי מלא ימצו למו br

יא ואמרו איכה ידע-אל ויש דעה בעליון br

יב הנה-אלה רשעים ושלוי עולם השגו-חיל br

יג אך-ריק זכיתי לבבי וארחץ בנקיון כפי br

יד ואהי נגוע כל-היום ותוכחתי לבקרים br

טו אם-אמרתי אספרה כמו הנה דור בניך בגדתי br

טז ואחשבה לדעת זאת עמל היא (הוא) בעיני br

יז עד-אבוא אל-מקדשי-אל אבינה לאחריתם br

יח אך בחלקות תשית למו הפלתם למשואות br

יט איך היו לשמה כרגע ספו תמו מן-בלהות br

כ כחלום מהקיץ-- אדני בעיר צלמם תבזה br

כא כי יתחמץ לבבי וכליותי אשתונן br

כב ואני-בער ולא אדע בהמות הייתי עמך br

כג ואני תמיד עמך אחזת ביד-ימיני br

כד בעצתך תנחני ואחר כבוד תקחני br

כה מי-לי בשמים ועמך לא-חפצתי בארץ br

כו כלה שארי ולבבי צור-לבבי וחלקי--אלהים לעולם br

כז כי-הנה רחקיך יאבדו הצמתה כל-זונה ממך br

כח ואני קרבת אלהים-- לי-טוב br שתי באדני יהוה מחסי לספר כל-מלאכותיך