א למנצח לבני-קרח משכיל br

ב אלהים באזנינו שמענו-- אבותינו ספרו-לנו br פעל פעלת בימיהם בימי קדם br

ג אתה ידך גוים הורשת-- ותטעם br תרע לאמים ותשלחם br

ד כי לא בחרבם ירשו ארץ וזרועם לא-הושיעה-למו br כי-ימינך וזרועך ואור פניך-- כי רציתם br

ה אתה-הוא מלכי אלהים צוה ישועות יעקב br

ו בך צרינו ננגח בשמך נבוס קמינו br

ז כי לא בקשתי אבטח וחרבי לא תושיעני br

ח כי הושעתנו מצרינו ומשנאינו הבישות br

ט באלהים הללנו כל-היום ושמך לעולם נודה סלה br

י אף-זנחת ותכלימנו ולא-תצא בצבאותינו br

יא תשיבנו אחור מני-צר ומשנאינו שסו למו br

יב תתננו כצאן מאכל ובגוים זריתנו br

יג תמכר-עמך בלא-הון ולא-רבית במחיריהם br

יד תשימנו חרפה לשכנינו לעג וקלס לסביבותינו br

טו תשימנו משל בגוים מנוד-ראש בלאמים br

טז כל-היום כלמתי נגדי ובשת פני כסתני br

יז מקול מחרף ומגדף מפני אויב ומתנקם br

יח כל-זאת באתנו ולא שכחנוך ולא-שקרנו בבריתך br

יט לא-נסוג אחור לבנו ותט אשרינו מני ארחך br

כ כי דכיתנו במקום תנים ותכס עלינו בצלמות br

כא אם-שכחנו שם אלהינו ונפרש כפינו לאל זר br

כב הלא אלהים יחקר-זאת כי-הוא ידע תעלמות לב br

כג כי-עליך הרגנו כל-היום נחשבנו כצאן טבחה br

כד עורה למה תישן אדני הקיצה אל-תזנח לנצח br

כה למה-פניך תסתיר תשכח ענינו ולחצנו br

כו כי שחה לעפר נפשנו דבקה לארץ בטננו br [ (Psalms 44:27) כז קומה עזרתה לנו ופדנו למען חסדך ]