א למנצח על-ידותון-- מזמור לדוד br

ב אך אל-אלהים דומיה נפשי ממנו ישועתי br

ג אך-הוא צורי וישועתי משגבי לא-אמוט רבה br

ד עד-אנה תהותתו על-איש-- תרצחו כלכם br כקיר נטוי גדר הדחויה br

ה אך משאתו יעצו להדיח-- ירצו כזב br בפיו יברכו ובקרבם יקללו-סלה br

ו אך לאלהים דומי נפשי כי-ממנו תקותי br

ז אך-הוא צורי וישועתי משגבי לא אמוט br

ח על-אלהים ישעי וכבודי צור-עזי מחסי באלהים br

ט בטחו בו בכל-עת עם-- שפכו-לפניו לבבכם br אלהים מחסה-לנו סלה br

י אך הבל בני-אדם-- כזב בני-איש br במאזנים לעלות המה מהבל יחד br

יא אל-תבטחו בעשק ובגזל אל-תהבלו br חיל כי-ינוב-- אל-תשיתו לב br

יב אחת דבר אלהים--שתים-זו שמעתי כי עז לאלהים br [ (Psalms 62:13) יג ולך-אדני חסד כי-אתה תשלם לאיש כמעשהו ]