א למנצח על-ששנים לבני-קרח משכיל שיר ידידת br

ב רחש לבי דבר טוב-- אמר אני מעשי למלך br לשוני עט סופר מהיר br

ג יפיפית מבני אדם-- הוצק חן בשפתותיך br על-כן ברכך אלהים לעולם br

ד חגור-חרבך על-ירך גבור-- הודך והדרך br

ה והדרך צלח רכב-- על-דבר-אמת וענוה-צדק br ותורך נוראות ימינך br

ו חציך שנונים עמים תחתיך יפלו בלב אויבי המלך br

ז כסאך אלהים עולם ועד שבט מישר שבט מלכותך br

ח אהבת צדק ותשנא-רשע br על-כן משחך אלהים אלהיך שמן ששון-- מחברך br

ט מר-ואהלות קציעות כל-בגדתיך מן-היכלי שן מני שמחוך br

י בנות מלכים ביקרותיך נצבה שגל לימינך בכתם אופיר br

יא שמעי-בת וראי והטי אזנך ושכחי עמך ובית אביך br

יב ויתאו המלך יפיך כי-הוא אדניך והשתחוי-לו br

יג ובת-צר במנחה פניך יחלו--עשירי עם br

יד כל-כבודה בת-מלך פנימה ממשבצות זהב לבושה br

טו לרקמות תובל למלך בתולות אחריה רעותיה--מובאות לך br

טז תובלנה בשמחת וגיל תבאינה בהיכל מלך br

יז תחת אבתיך יהיו בניך תשיתמו לשרים בכל-הארץ br [ (Psalms 45:18) יח אזכירה שמך בכל-דר ודר על-כן עמים יהודוך לעלם ועד ]