א לדוד-- בשנותו את-טעמו לפני אבימלך ויגרשהו וילך br

ב אברכה את-יהוה בכל-עת תמיד תהלתו בפי br

ג ביהוה תתהלל נפשי ישמעו ענוים וישמחו br

ד גדלו ליהוה אתי ונרוממה שמו יחדו br

ה דרשתי את-יהוה וענני ומכל-מגורותי הצילני br

ו הביטו אליו ונהרו ופניהם אל-יחפרו br

ז זה עני קרא ויהוה שמע ומכל-צרותיו הושיעו br

ח חנה מלאך-יהוה סביב ליראיו ויחלצם br

ט טעמו וראו כי-טוב יהוה אשרי הגבר יחסה-בו br

י יראו את-יהוה קדשיו כי-אין מחסור ליראיו br

יא כפירים רשו ורעבו ודרשי יהוה לא-יחסרו כל-טוב br

יב לכו-בנים שמעו-לי יראת יהוה אלמדכם br

יג מי-האיש החפץ חיים אהב ימים לראות טוב br

יד נצר לשונך מרע ושפתיך מדבר מרמה br

טו סור מרע ועשה-טוב בקש שלום ורדפהו br

טז עיני יהוה אל-צדיקים ואזניו אל-שועתם br

יז פני יהוה בעשי רע להכרית מארץ זכרם br

יח צעקו ויהוה שמע ומכל-צרותם הצילם br

יט קרוב יהוה לנשברי-לב ואת-דכאי-רוח יושיע br

כ רבות רעות צדיק ומכלם יצילנו יהוה br

כא שמר כל-עצמותיו אחת מהנה לא נשברה br

כב תמותת רשע רעה ושנאי צדיק יאשמו br [ (Psalms 34:23) כג פדה יהוה נפש עבדיו ולא יאשמו כל-החסים בו ]